Shtime, 12 qershor 2026- Me rastin e shënimit të Ditës së Çlirimit të Komunës së Shtimes, sot u zhvilluan aktivitete përkujtimore dhe institucionale për nder të dëshmorëve, martirëve dhe të gjithë atyre që sakrifikuan për lirinë e Kosovës.
Kryetari i Komunës së Shtimes, Qemajl Aliu, së bashku me nënkryetarin Adnan Ademi, kabinetin qeverisës, përfaqësues të OVL e UÇK-së Dega në Shtime, përfaqësues të Këshillit të Bashkësisë Islame në Shtime, përfaqësues të institucioneve të tjera, zyrtarë komunalë dhe qytetarë, bënë homazhe dhe vendosën buqeta lulesh në vendet simbolike të kujtesës historike.
Homazhet filluan te shtatorja e Komandantit Legjendar Adem Jashari në qytetin e Shtimes, ku të pranishmit u përkulën me respekt para figurës emblematike të luftës për liri. Më pas, homazhet vazhduan në Varrezat e Dëshmorëve të UÇK-së në Shtime, si dhe në Reçak, Mollopolc, Rancë dhe Carralevë, vende që dëshmojnë për sakrificën, qëndresën dhe rrugëtimin e popullit tonë drejt lirisë.
Për nder të kësaj date të rëndësishme, u mbajt edhe seanca solemne e Kuvendit të Komunës së Shtimes, e udhëhequr nga kryesuesi i Kuvendit, Rrahman Jakupi. Në këtë seancë morën pjesë nënkryetari i Komunës, Adnan Ademi, drejtorë komunalë, përfaqësues institucionalë dhe të ftuar të tjerë.
Seancën e hapi kryesuesi Jakupi, i cili, pasi përshëndeti të pranishmit, foli për rrugëtimin e popullit të Kosovës nga periudha e paraluftës, përmes viteve të luftës çlirimtare e deri te liria dhe zhvillimet që po jetojmë sot.
Pas tij, fjalën e mori nënkryetari i Komunës, Adnan Ademi, i cili tha se në këtë ditë të veçantë duhet të kujtojmë dhe të nderojmë të gjithë ata që sakrifikuan për lirinë dhe për të ardhmen që sot e gëzojmë.
Një fjalë rasti mbajti edhe Ali Uka, në emër të OVL-UÇK-së, i cili theksoi rëndësinë e unitetit dhe angazhimit të përbashkët për të mirën e shtetit tonë, duke ruajtur gjithmonë kujtimin dhe respektin për veprën e dëshmorëve dhe veteranëve të luftës çlirimtare.
Për të përmbyllur aktivitetet e 12 Qershorit, të organizuara nën patronatin e Kryetarit të Komunës së Shtimes, Dr. Qemajl Aliu, nga ora 19:00, në Shtëpinë e Kulturës në Shtime, do të mbahet koncerti festiv i organizuar në nderim të Ditës së Çlirimit të Komunës së Shtimes.
