Shtime, 25 qershor 2026 – Është mbajtur sot mbledhja e dytë për këtë vit e Komitetit për Politikë dhe Financa (KPF), e udhëhequr nga kryesuesi i Kuvendit të Komunës, Rrahman Jakupi.
Pas miratimit të procesverbalit nga mbledhja e kaluar, anëtarët e komitetit shqyrtuan dhe rekomanduan për miratim në mbledhjen e radhës të Kuvendit të Komunës, e cila do të mbahet nesër, këto pika të rendit të ditës:
-Propozim-vendim për zëvendësimin e anëtares së KPF-së, Yllkë Fejzullahu, me një anëtar të ri;
-Rishqyrtimi i Vendimit nr. 01/74, të datës 30.04.2026, për zgjedhjen e Komitetit për Komunitete, sipas rekomandimeve të Ministrisë së Administrimit të Pushtetit Lokal (MAPL);
-Draft-Korniza Afatmesme Buxhetore Komunale 2027–2029, pas diskutimit publik;
-Raporti i përgjithshëm gjashtëmujor i punës së ekzekutivit të Komunës së Shtimes;
-Plani i veprimit për implementimin e rekomandimeve të Zyrës Kombëtare të Auditimit;
Draft-Plani Ndërkomunal për Menaxhimin e Integruar të Mbeturinave për rajonin e Gjilanit dhe Ferizajt, sipas rekomandimeve të Ministrisë së Mjedisit, Planifikimit Hapësinor dhe Infrastrukturës (MMPHI).
Mbledhja e radhës e Kuvendit të Komunës së Shtimes do të mbahet nesër, më 26 qershor 2026, duke filluar nga ora 10:00.
