Shtime, 13 qershor 2026- Në një atmosferë të jashtëzakonshme festive, plot emocion, krenari dhe art, mbrëmë u përmbyllën aktivitetet e organizuara nën patronatin e kryetarit të komunës dr. Qemajl Aliu, për shënimin e 27 vjetorit të Çlirimit të Komunës së Shtimes me koncertin festiv “Ditët e Lirisë”, një ngjarje që pa dyshim do të mbetet gjatë në kujtesën e qytetarëve.
Për herë të parë në qytetin tonë, publiku pati mundësinë të shijojë një spektakël artistik të veçantë, të realizuar nga formacioni “Besiana dhe Të Mirët e Kombit” në bashkëpunim me A.K.V. “Ilirida” nga Shtimja. Programi i pasur me këngë dhe valle nga thesari ynë kombëtar solli emocione të forta dhe duartrokitje të pandërprera, duke krijuar një mbrëmje të paharrueshme për të gjithë të pranishmit.
Koncerti u moderua me mjeshtëri nga mezzosopranoja dhe artistja Besiana Mehmeti, ndërsa nën drejtimin artistik dhe përgatitjen profesionale të Shkodran Tolajt, ngjarja mori përmasa të një spektakli të mirëfilltë kulturor, i vlerësuar për konceptin unik dhe realizimin e shkëlqyer.
Në skenë performuan artistë të njohur nga të gjitha trojet shqiptare, duke e bërë këtë mbrëmje një festë të vërtetë të kulturës dhe identitetit kombëtar.
Nder të ftuarit e veçantë ishte edhe Mjeshtri i Madh, Zhani Ciko, i cili dirigjoi disa nga interpretimet e koncertit. Publiku pati rastin të shijojë edhe performancat e baritonit Armando Likaj, pianistes Rudina Ciko dhe Mjeshtrit të Madh Llesh Nikolla.
Përmes një repertori të përzgjedhur enkas për këtë datë të shënuar, me vepra si “Besa, besë”, “Ai është i gjallë”, “Unë biri yt Kosovë”, “Këngë moj”, “Kosova, Kosova”, “Albulena” dhe “Fjalët e qiriut”, koncerti mori një dimension të veçantë emocional dhe atdhetar. Me respekt dhe mirënjohje të thellë u përkujtuan dëshmorët, martirët, veteranët dhe të gjithë luftëtarët e lirisë, të cilët sakrifikuan gjithçka për Kosovën e lirë dhe të pavarur. Njëkohësisht, u shpreh mirënjohje e pafundme për familjet e tyre, të cilat me krenari ruajnë kujtimin dhe amanetin më të shenjtë të kombit tonë.
Duke iu drejtuar të pranishmëve, kryetari i Komunës së Shtimes, dr. Qemajl Aliu, kujtoi rrugëtimin heroik të UÇK-së dhe sakrificën e dëshmorëve për lirinë e vendit. Ai theksoi se Shtimja po ndërtohet jo vetëm me projekte zhvillimore, por edhe me dashuri për atdheun, me respekt për të kaluarën dhe me vizion për të ardhmen.
“Është nder i veçantë që këtë ditë të madhe të lirisë ta përmbyllim me një koncert festiv e solemn, i cili i jep shkëlqim të veçantë kësaj feste”, tha kryetari Aliu, duke falënderuar artistët e shquar nga të gjitha trojet shqiptare për praninë dhe interpretimet e tyre të mrekullueshme. Një falënderim të veçantë ai shprehu edhe për Ansamblin “Ilirida”, i cili me përkushtim dhe profesionalizëm po e prezanton denjësisht emrin e Shtimes në festivalet më të rëndësishme vendore dhe ndërkombëtare.
Kjo mbrëmje madhështore artistike shënoi përmbylljen e denjë të aktiviteteve të organizuara për 27 ĺvjetorin e Çlirimit të Komunës së Shtimes, duke lënë pas emocione, krenari dhe kujtime të bukura që do të ruhen gjatë në zemrat e qytetarëve.
