Shtime, 20 maj 2025- Pas shumë muajsh përkushtimi, stërvitjesh dhe përballjesh të forta, klubi FC Shtimja 26 ka arritur të realizojë një ëndërr të madhe, ngjitjen në Superligën e Kosovës në futsall. Ky sukses është një moment historik jo vetëm për klubin, por për gjithë qytetin e Shtimes dhe sportin në komunën tonë. Me këtë rast të veçantë, urimin e tij e jep edhe Kryetari i Komunës së Shtimes, Qemajl Aliu.
“Të dashur sportdashës dhe qytetarë të Shtimes, me krenari dhe gëzim të madh e përcolla lajmin për suksesin historik të klubit tonë të futsallit, FC Shtimja 26, që tashmë është bërë pjesë e Superligës së Kosovës në futsall.
Ky sukses është fryt i një sezoni të gjatë e të vështirë, të mbushur me përkushtim, sakrificë dhe punë të palodhshme nga lojtarët, trajnerët dhe gjithë stafi i klubit. Fitorja e fundit ndaj “Jetoni Futsal” me rezultat bindës 8:3 ishte vetëm kurorëzimi i një rruge të lavdishme.
Një falënderim i veçantë shkon për tifozët tanë të mrekullueshëm, të cilët gjatë gjithë sezonit ishin shtylla e fortë e motivit dhe forcës së ekipit. Ju jeni zemra e sportit në qytetin tonë!
FC Shtimja 26 ka shkruar një kapitull të ri për sportin në komunën tonë. Ne, si institucion, do të jemi përherë pranë jush në çdo hap të këtij rrugëtimi të ri, sepse suksesi juaj është krenaria jonë e përbashkët. Urime të përzemërta – drejt fitoreve të reja në Superligë”, tha kryetari Aliu.
