Shtime, 11 shtator 2026- Kryetari i Komunës së Shtimes, dr. Qemajl Aliu, së bashku me drejtorin e Drejtorisë për Buxhet dhe Financa, Besnik Ahmeti, dhe përfaqësues të ekzekutivit komunal, mori pjesë në dëgjimet buxhetore me qytetarë, të organizuara në kuadër të procesit të hartimit të Projektbuxhetit për periudhën 2027-2029.
Dëgjimi i organizuar për grupet e nënpërfaqësuara, gratë, të rinjtë, pensionistët, personat me aftësi të kufizuara, klubet sportive, bizneset dhe qytetarët u zhvillua në sallën e Kuvendit të Komunës së Shtimes.
Në fjalën e tij, Kryetari Aliu theksoi rëndësinë e pjesëmarrjes së qytetarëve në procesin e planifikimit të buxhetit, duke vlerësuar se kërkesat dhe propozimet e tyre janë të rëndësishme për përcaktimin e prioriteteve të komunës.
“Buxheti nuk është vetëm një dokument financiar, por një plan i punës dhe zhvillimit të komunës. Përmes këtyre dëgjimeve synojmë të dëgjojmë drejtpërdrejt qytetarët, të kuptojmë nevojat e tyre dhe të përcaktojmë prioritetet që do të ndikojnë drejtpërdrejt në përmirësimin e jetës së tyre. Ne do t’i shqyrtojmë me kujdes të gjitha kërkesat e paraqitura dhe do të punojmë që ato të reflektohen në buxhet, në përputhje me mundësitë dhe prioritetet e komunës”, tha Kryetari Aliu.
Në hapje të dëgjimit publik, drejtori i Drejtorisë për Buxhet dhe Financa, Besnik Ahmeti, i njoftoi të pranishmit në detaje lidhur me Projektbuxhetin për vitin 2027. Ai tha se buxheti i planifikuar për vitin e ardhshëm është më i lartë krahasuar me buxhetin e vitit aktual.
Sipas prezantimit të bërë, buxheti i planifikuar për vitin 2027 kap vlerën prej mbi 11 milionë euro, i ndarë në pesë kategori të ndryshme buxhetore.
Gjatë diskutimit, qytetarët dhe përfaqësuesit e grupeve të ndryshme paraqitën kërkesat, propozimet dhe nevojat e tyre. Një pjesë e madhe e kërkesave u fokusuan në investime infrastrukturore, përfshirë ndriçimin publik, kanalizimet, ujësjellësin, trotuaret dhe projekte të tjera që lidhen me përmirësimin e infrastrukturës dhe shërbimeve publike.
Dëgjimet buxhetore kanë vazhduar edhe sot, me pjesëmarrjen e përfaqësuesve të ekzekutivit dhe kuvendit si dhe me pjesëmarrjen e qytetarëve, asamblistëve dhe anëtarëve të Komitetit për Politikë dhe Financa.
Ky ishte dëgjimi i fundit buxhetor në kuadër të procesit të hartimit të Projektbuxhetit për vitin 2027. Gjatë këtyre dëgjimeve janë pranuar një sërë kërkesash dhe propozimesh nga qytetarët dhe grupet e ndryshme, të cilat do të shqyrtohen nga institucionet komunale për mundësinë e përfshirjes së tyre në buxhetin e vitit të ardhshëm.
