Shtime, 11 qershor 2026- Në Shtëpinë e Kulturës në Shtime është mbajtur sot ceremonia solemne e ndarjes së mirënjohjeve për nxënësit dhe shkollat fituese në Garën Komunale të Diturisë 2026.
Në këtë ngjarje morën pjesë kryetari i Komunës së Shtimes, dr. Qemajl Aliu, shefi i Sektorit të Arsimit, Lulzim Sahiti, drejtues shkollash, mësimdhënës, nxënës, prindër dhe qytetarë.
Në fjalën e tij drejtuar të pranishmëve, kryetari Aliu tha se, teksa komuna ndodhet në prag të shënimit të Ditës së Çlirimit, ka kënaqësinë të jetë pjesë e një ngjarjeje po aq domethënëse, siç është ndarja e çmimeve për nxënësit që kanë treguar rezultate të shkëlqyera në Garën Komunale të Diturisë.
“Liria dhe zhvillimi i një vendi nuk maten me atë që është arritur në të kaluarën, por edhe me investimin që bëjmë për të ardhmen. E ardhmja e Shtimes është rinia jonë, janë nxënësit tanë, të cilët me përkushtimin dhe sukseset e tyre po na bëjnë krenarë çdo ditë. Si qeverisje komunale mbetemi të përkushtuar që arsimi të jetë ndër prioritetet tona kryesore. Po punojmë vazhdimisht për të krijuar kushte më të mira për zhvillim dhe mësim”, tha kryetari Aliu, duke falënderuar të gjithë mësimdhënësit, nxënësit dhe shkollat për angazhimin shembullor në këtë garë.
Ndërsa shefi i Sektorit të Arsimit, Lulzim Sahiti, tha se ky sukses është rezultat i përkushtimit të nxënësve, mbështetjes së prindërve dhe punës së palodhshme të mësimdhënësve.
“U shpreh urimet më të sinqerta për të gjithë nxënësit fitues dhe mirënjohjen tonë për secilin mësimdhënës që kontribuon çdo ditë në edukimin dhe formimin e gjeneratave të reja”, tha Sahiti.
Në vazhdim të ceremonisë u shpërblyen shkollat më të dalluara sipas rezultateve të arritura në garë. Vendin e parë e fitoi Shkolla Fillore e Mesme e Ulët “Lasgush Poradeci” nga Muzeqina, vendin e dytë Shkolla e Mesme e Ulët “Emin Duraku” nga Shtimja, ndërsa vendin e tretë Shkolla Fillore e Mesme e Ulët “Abdullah Shabani” nga Carraleva.
Mirënjohje u ndanë edhe për nxënësit fitues të shkollës “Bajram Curri” nga Petrova, si dhe për nxënësit e shkollave “Skënderbeu” nga Reçaku, “Hasan Prishtina” nga Godanci dhe “Idriz Ajeti” nga Pjetërshtica.
Këtë vit, për dallim nga vitet e mëparshme, për herë të parë u aplikua testimi në formë elektronike.
Në Garën Komunale të Diturisë, të mbajtur më 18 dhe 19 maj të këtij viti, dijen e tyre e sfiduan gjithsej 215 nxënës nga të gjitha shkollat e mesme të ulëta të komunës, prej të cilëve 105 nxënës u renditën në vendet e para, të dyta dhe të treta.
Testit të diturisë iu nënshtruan nxënësit e klasave të gjashta, të shtata, të teta dhe të nënta.
Gara u zhvillua në nëntë lëndë mësimore: gjuhë shqipe, gjuhë angleze, gjeografi, histori, matematikë, biologji, fizikë, kimi dhe teknologji informative.
