Shtime, 30 prill 2026- Mbledhja e tretë e Kuvendit të Komunës së Shtimes për këtë vit u hap me një minutë heshtje në nderim të ish-asambleistes Yllkë Fejzullahu, ndërsa po ashtu u përkujtuan edhe dy dëshmorët e komunës, Alush Mustafa dhe Istref Emini, në 27-vjetorin e rënies së tyre.
Pas këtij momenti përkujtimor, seanca e udhehequr nga kryesuesi i kuvendit Rrahman Jakupi, vijoi me betimin e anëtarit të ri të Kuvendit, Asllan Beqaj, i cili mori zyrtarisht detyrën e tij. Në vazhdim, u miratua edhe procesverbali i mbledhjes së kaluar, duke hapur rrugën për shqyrtimin e pikave të tjera të rendit të ditës.
Diskutimet më të gjera u zhvilluan në pikën “Pyetje-Përgjigje”, ku anëtarët e kuvendit ngritën çështje të ndryshme. Më pas, u trajtua rishqyrtimi i Vendimit Nr. 01/35, i datës 05.03.2026, për zgjedhjen e Komitetit për Komunitete, sipas rekomandimeve të Ministrisë së Administrimit të Pushtetit Lokal (MAPL). Ky propozim u miratua me shumicë votash, duke rezultuar në formimin e këtij komiteti.
Në pjesën përmbyllëse të mbledhjes, drejtori i financave, Besnik Ahmeti, paraqiti sqarime lidhur me tri pika të rëndësishme: Rishqyrtimin e Rregullores Nr. 01/45 për taksa, tarifa dhe gjoba për vitin 2026, Pasqyrat financiare për vitin 2025, si dhe Raportin financiar për periudhën janar-mars 2026. Të gjitha këto pika u miratuan me shumicë votash nga anëtarët e kuvendit.
