Shtime, 28 qershor 2026- Në një atmosferë festive u mbajt ceremonia e ndarjes së certifikatave për mbi 220 të rinj e të reja nga Komuna e Shtimes, të cilët përfunduan me sukses programet edukative të organizuara nga Flutura Academy.
Pjesëmarrësit ndoqën me përkushtim trajnime në fusha të rëndësishme si teknologjia informative, programimi dhe gjuhët e huaja, duke fituar njohuri dhe aftësi që rrisin mundësitë e tyre për studime të mëtejshme dhe integrim në tregun e punës.
Ky program u realizua falë marrëveshjes së bashkëpunimit ndërmjet Komunës së Shtimes dhe Flutura Academy, përmes së cilës Komuna subvencionoi pjesëmarrjen e nxënësve në këto trajnime, duke ua mundësuar ndjekjen e tyre pa pagesë.
Në ceremoni morën pjesë Drejtoresha e Drejtorisë për Inovacion, Hamide Sherfiki- Tërshani, përfaqësues dhe drejtues të Flutura Academy, prindër, familjarë dhe qytetarë të shumtë, të cilët ndanë emocionet dhe krenarinë për suksesin e të rinjve.
Drejtoresha e Drejtorisë për Inovacion, Hamide Sherifi-Tërshani, tha se investimi në arsim dhe në zhvillimin profesional të të rinjve është investimi më i vlefshëm për të ardhmen e komunës tonë.
Në fund të ceremonisë u shpërndanë certifikatat për të gjithë pjesëmarrësit, ndërsa u vlerësua lart bashkëpunimi ndërmjet institucioneve dhe platformave edukative si Flutura Academy, si një model i rëndësishëm për fuqizimin e të rinjve dhe përgatitjen e tyre për sfidat e së ardhmes.
