Shtime, 10 maj 2026- Në 27 vjetorin e rënies, kujtojmë me nderim dhe respekt të thellë dëshmorët Afrim Sylën dhe Islam Nezirajn, dy bij të vendit që iu përgjigjën thirrjes së atdheut në kohën kur liria kërkonte sakrificë dhe guxim.
Me idealin për një Kosovë të lirë, ata u rreshtuan në mbrojtje të vendit, duke treguar vendosmëri dhe përkushtim deri në flijimin e jetës së tyre.
Rënia e Afrimit dhe Islamit mbetet dëshmi e rrugës së vështirë që kaloi populli ynë drejt lirisë dhe dinjitetit.
Edhe pas 27 vitesh, kujtimi për ta vazhdon të jetojë në zemrat e qytetarëve dhe në historinë e Kosovës. Emrat e tyre përmenden me krenari e respekt, si simbol i qëndresës dhe dashurisë për atdheun. Sakrifica e tyre mbetet frymëzim për brezat që të ruajnë dhe ta çmojnë lirinë e fituar me shumë mund.
Në këtë përvjetor, përulemi me respekt para veprës dhe sakrificës së Afrim Sylës dhe Islam Nezirajt, duke kujtuar gjithmonë kontributin e tyre për lirinë e Kosovës.
Lavdi e përhershme Afrim Sylës dhe Islam Nezirajt!
