Shtime, 26 korrik 2026- Në nderim të 28 vjetorit të Ditës së Dëshmorëve të Komunës së Shtimes, u zhvilluan homazhe dhe u vendosën kurora me lule në nderim të atyre që sakrifikuan jetën për lirinë e Kosovës.
Homazhet nisën pranë shtatores së Kryekomandantit Adem Jashari, për të vazhduar në Kompleksin Memorial të Dëshmorëve në Reçak, Mollopolc e Zborc.
Në kuadër të aktiviteteve përkujtimore, kryetari i Komunës së Shtimes, Dr. Qemajl Aliu, së bashku me deputetët e Kuvendit të Kosovës, Shqipe Selimi dhe Ilir Qeriqi, vizituan edhe familjen e Heroit Ruzhdi Salihu, dëshmorit të parë të Komunës së Shtimes, duke shprehur respektin dhe mirënjohjen për sakrificën e tij dhe të familjes Salihu.
Homazhet vazhduan edhe në Kompleksin e Varrezave të Dëshmorëve në Shtime.
Në këtë kompleks, të pranishmit panë nga afër edhe investimet e realizuara nga Komuna e Shtimes për rregullimin dhe përmirësimin e infrastrukturës së kompleksit, duke dëshmuar përkushtimin institucional për ruajtjen me dinjitet të kujtimit të dëshmorëve.
Në homazhe morën pjesë kryetari i Komunës së Shtimes, Dr. Qemajl Aliu, përfaqësues të Organizatave të Dala nga Lufta të UÇK-së, familjarë të dëshmorëve, përfaqësues institucionesh, bashkëpunëtorë dhe qytetarë të shumtë.
Me këtë rast, kryetari Aliu theksoi se kujtimi për dëshmorët nuk kufizohet vetëm në një datë përkujtimore, por është një obligim i përhershëm institucional dhe qytetar.
“Çdo homazh që bëjmë sot është shprehje e mirënjohjes sonë të përjetshme për ata që sakrifikuan jetën për lirinë e Kosovës. Kjo ditë na rikujton se liria që gëzojmë është ndërtuar mbi gjakun e dëshmorëve. Prandaj, e kemi për detyrë morale dhe institucionale që veprën e tyre ta ruajmë, ta nderojmë dhe ta përcjellim me krenari te brezat që vijnë. Investimet në Kompleksin e Varrezave të Dëshmorëve janë një shenjë respekti ndaj sakrificës së tyre dhe një dëshmi se kujtesa për ta do të mbetet gjithmonë e gjallë”, tha kryetari Aliu.
Në kuadër të shënimit të 28 vjetorit të Ditës së Dëshmorëve, përfaqësuesit e Komunës së Shtimes zhvilluan homazhe edhe në Vojnoc, Belinc, Carralevë, si dhe në Varrezat e Dëshmorëve të UÇK-së në Suharekë, Kleçkë dhe Koshare, duke nderuar me respekt të gjithë ata që dhanë jetën për lirinë e atdheut.
