Shtime, 19 qershor 2026- Nënkryetari i Komunës së Shtimes, Adnan Ademi, ka mbajtur takimin e parë publik me qytetarët për vitin 2026, ku prezantoi punën dhe projektet e realizuara gjatë gjashtëmujorit të parë të vitit, si dhe Kornizën Afatmesme Buxhetore (KAB) 2027-2029.
Takimi mblodhi qytetarë, përfaqësues të fshatrave dhe të zonave urbane, të cilët patën mundësinë të informohen për zhvillimet komunale, si dhe të paraqesin kërkesat, propozimet dhe nevojat e komuniteteve të tyre.
Në fjalën e tij hyrëse, nënkryetari Ademi prezantoi projektet dhe aktivitetet kryesore që kanë karakterizuar gjashtëmujorin e parë të vitit 2026, duke theksuar përkushtimin e qeverisjes komunale për realizimin e zotimeve dhe investimeve në të gjitha pjesët e komunës.
Ndër projektet më të rëndësishme të prezantuara ishin punime që po zhvillohen për ndërtimin e Qendrës së re Kryesore të Mjekësisë Familjare (QKMF), rregullimin e shtratit të lumit Shtimjanja, ndërtimin e Entit Special, si dhe objektit të ri të administratës komunale, i cili tashmë është drejt përfundimit. Gjithashtu, u prezantuan edhe investime të tjera të rëndësishme, përfshirë ndërtimin e parqeve nëpër fshatra, asfaltimin dhe përmirësimin e rrugëve lokale e malore, renovimin e shkollave, përfitimin e disa institucioneve arsimore nga Fondi për Efiçiencë të Energjisë, si dhe adaptimin e objektit për ndërtimin e çerdhes së re në fshatin Carralevë.
Gjatë takimit, u theksua se investimet komunale janë shpërndarë në mënyrë të balancuar në qytet dhe në fshatra, gjë që u vlerësua nga përfaqësuesit lokalë dhe qytetarët e pranishëm.
Në pjesën e dytë të takimit, nënkryetari Ademi prezantoi Kornizën Afatmesme Buxhetore 2027-2029, duke bërë të ditur se për vitin 2027 parashihet një buxhet më i lartë krahasuar me vitin aktual, me fokus në realizimin e projekteve zhvillimore dhe përmirësimin e shërbimeve për qytetarët.
Pas prezantimit, qytetarët paraqitën pyetje, komente dhe kërkesa të ndryshme, ndër të cilat u veçuan nevoja për rregullimin e rrugëve dhe trotuareve, shtrimin me zhavorr të disa rrugëve lokale, ndriqim publik, përmirësimin e sistemit të kanalizimit, ndërtimin e fushave sportive dhe rregullimin e hapësirave publike.
Pyetjeve dhe kërkesave të qytetarëve iu përgjigjën nënkryetari Ademi dhe drejtorët e drejtorive komunale, të cilët ofruan sqarimet e nevojshme lidhur me projektet aktuale dhe planifikimet për periudhën e ardhshme.
Qytetarët e pranishëm vlerësuan punën dhe angazhimin e kryetarit të Komunës, dr. Qemajl Aliu, dhe të ekzekutivit komunal, duke shprehur mirënjohje për investimet dhe projektet e realizuara në shërbim të qytetarëve.
