Shtime, 2 prill 2026- Në përkujtim të 27 vjetorit të rënies së dëshmorit Shefket Muhadini-Komandant Tamuli, sot në Shtëpinë e Kulturës në Shtime u mbajt akademi përkujtimore.
Në këtë ngjarje morën pjesë kryetari i Komunës së Shtimes, Dr. Qemajl Aliu, përfaqësues dhe kryesues të shoqatave të dala nga lufta e Ushtrisë Çlirimtare të Kosovës, bashkëluftëtarë, familjarë dhe qytetarë.
Me këtë rast, kryetari i komunës, Dr. Qemajl Aliu, tha se sot nderojmë jetën dhe veprën e Shefket Muhadinit-komandant Tamulit, luftëtarit që la mërgimin për t’iu përgjigjur kushtrimit të lirisë në radhët e UÇK-së.
“Sakrifica e tij mes Petrovës e Reçakut mbetet dëshmi e gjallë e guximit dhe dashurisë për atdheun. Liria që gëzojmë sot është amanet i bijve si Shefketi, që dhanë gjithçka për Kosovën. Ne ju jemi përherë mirënjohës e përulemi me respekt të thellë para madhështisë së Shefketit dhe bashkëluftëtarëve të tij. Lavdi e përjetshme dëshmorit Shefket Muhadini! Lavdi, nderim e respekt i përjetshëm të gjithë dëshmorëve të lirisë”, tha kryetari Aliu.
Gjatë akademisë, bashkëluftëtarët kujtuan komandant Tamulin për trimërinë, përkushtimin dhe rolin e tij të rëndësishëm në luftën për liri. Në kuadër të aktivitetetit përkujtimor, Organizata e Veteranëve të Luftës së UÇK-së, dega në Shtime, në bashkëpunim me familjen Muhadini, kishte organizuar edhe homazhe në varrezat e dëshmorëve, një aksion për dhurimin e gjakut dhe një turnir në futboll të vogël. Gjithashtu, gjatë akademisë u shfaq një film dokumentar kushtuar jetës dhe veprës së dëshmorit Shefket Muhadini-Komandant Tamuli, duke rikujtuar kontributin e tij të jashtëzakonshëm për lirinë e Kosovës.
