Shtime, 10 shtator 2026- Kryetari i Komunës së Shtimes, dr. Qemajl Aliu, së bashku me Kolonelin e KFOR-it Turk, Harun Elitaş, morën pjesë në ceremoninë e përurimit të renovimit të plotë të Sh.F.M.U. “Abdullah Shabani” në fshatin Zborc.
Falë projektit të realizuar nga KFOR-i Turk, kjo shkollë tashmë ofron kushte moderne dhe të dinjitetshme për nxënësit dhe mësimdhënësit, duke krijuar një mjedis më të përshtatshëm për zhvillimin e procesit mësimor.
“Në emër timin dhe të gjithë qytetarëve të Komunës së Shtimes, shpreh mirënjohjen më të thellë dhe falënderoj Komandantin e Kryesisë së Këshillit Turk në Kosovë, Kolonelin Harun Elitaş, për këtë investim në vlerë mbi 17 mijë euro në infrastrukturën e shkollës së fshatit.
Investimi në arsim është investim në të ardhmen e fëmijëve tanë. Faleminderit KFOR-it Turk për mbështetjen e vazhdueshme”, tha kryetari Aliu duke shprehur mirënjohjen për KFOR-in Turk për mbështetjen e vazhdueshme ndaj institucioneve arsimore të Komunës së Shtimes.
Përmes këtij projekti, shkolla është lyer plotësisht, janë mobiluar klasat dhe zyrat, janë vendosur kondicionerë dhe pajisje teknologjike, si dhe janë renovuar tualetet. Vlera e investimit në infrastrukturën e shkollës kap shumën mbi 17 mijë euro.
