Shtime, 11 maj 2026- Në fshatin Mollopolc, sot u shënua 27 vjetori i Betejës së Mollopolcit.
Të pranishëm në këtë manifestim përkujtimor ishin përfaqësues institucionesh, ish-komandantë, familjarë të dëshmorëve, veteranë të luftës dhe qytetarë.
Ky manifestim u organizua nën patronatin e kryetarit te komunës së Shtimes dr. Qemajl Aliu, në bashkëpunim me Organizatën e Veteranëve të Luftës së UÇK-së, dega në Shtime dhe Ferizaj.
Në emër të Kryetarit të Komunës së Shtimes, Dr. Qemajl Aliu, të pranishmëve iu drejtua asamblisti i Kuvendit Komunal, Faruk Beqa, i cili theksoi rëndësinë historike dhe sakrificën e luftëtarëve të kësaj beteje.
“Jemi mbledhur sot këtu jo vetëm për të kujtuar një betejë, por për të nderuar një nga faqet më të lavdishme të luftës sonë çlirimtare, Betejën e Mollopolcit. Në këtë betejë, si në shumë të tjera, ranë ata që ia falën jetën Kosovës dhe dëshmuan se vdekja për liri është më e shtrenjtë se vetë jeta. Por, përkundër dhimbjes dhe sakrificës, morali nuk u thye kurrë”, tha Beqa.
Fjalë rasti në këtë manifestim mbajtën edhe ish-eprorë të UÇK-së dhe përfaqësues të organizatave të dala nga lufta, të cilët kujtuan me krenari luftën e lavdishme të luftëtarëve të lirisë dhe sakrificën e tyre për çlirimin e vendit. Ata vlerësuan lart heroizmin e dëshmorëve dhe kontributin e të gjithë atyre që, në momentet më të vështira, qëndruan të palëkundur në mbrojtje të atdheut.
Para fillimit të manifestimit, të pranishmit bënë homazhe dhe vendosën buqeta me lule pranë varrezave të dëshmorëve në fshatin Mollopolc.
Në fund të këtij manifestimi përkujtimor u ndanë edhe mirënjohje.
