Shtime, 9 maj 2026- Kryeministri i Republikës së Kosovës, Albin Kurti, ministrja e Ekonomisë, Artane Rizvanolli dhe drejtoresha e Fondit të Kosovës për Efiçiencë të Energjisë, Njomza Hoxha, së bashku me kryetarin e Komunës së Shtimes, dr. Qemajl Aliu, vizituan nga afër projektet e realizuara për efiçiencë energjetike në dy shkolla të komunës tonë.
Vizita nisi në Shkollën Profesionale në Shtime, ku u përurua projekti i renovimit dhe transformimit të objektit shkollor përmes investimeve në efiçiencë energjetike. Në këtë shkollë, falë investimit prej mbi 330 mijë eurosh nga Fondi i Kosovës për Efiçiencë të Energjisë, janë krijuar kushte dukshëm më të mira për nxënësit dhe stafin arsimor, ndërsa konsumi i energjisë është ulur mbi 50 për qind.
Kryeministri Kurti theksoi rëndësinë që kanë investimet në shkolla për zhvillimin e shoqërisë dhe përmirësimin e procesit mësimor.
“Nëse duam mjekë, infermierë, teknikë, profesionistë e qytetarë të përgjegjshëm, atëherë duhet që shkolla të jetë vend i ngrohtë, i ndriçuar, funksional dhe dinjitoz”, tha kryeministri Kurti, duke shtuar se në këtë objekt, i cili ka tri etazhe dhe mbi 6 mijë metra katrorë hapësirë, përfitojnë afër 500 nxënës dhe punonjës të shkollës, ndërsa investimi do të ndikojë drejtpërdrejt në kursimin e energjisë dhe përmirësimin e kushteve të mësimit.
“Efiçienca energjetike mbase tingëllon si një term teknik, por në shkollë ajo kuptohet shumë thjeshtë: klasa më të ngrohta në dimër, ndriçim më i mirë, ajër më i pastër, më pak humbje, më shumë përqendrim dhe më shumë dinjitet për nxënësit dhe mësimdhënësit”, tha kryeministri Kurti.
Ndërkaq, ministrja Rizvanolli bëri të ditur se ky projekt është pjesë e një fondi prej 3.8 milionë eurosh të ndarë nga Qeveria e Kosovës për investime në 13 objekte komunale, shumica prej tyre shkolla.
“Në këtë shkollë specifikisht, konsumi i energjisë është ulur përafërsisht mbi 50%, dhe kjo nuk është veç një shifër”, tha ministrja rizvanolli, duke shtuar se kursimet nga energjia do t’u mundësojnë komunave më shumë investime në fusha të tjera me interes për qytetarët.
Ndërsa, kryetari, dr. Qemajl Aliu, vlerësoi mbështetjen e institucioneve qendrore dhe rezultatet konkrete që po sjell bashkëpunimi me Qeverinë e Kosovës.
“Ky bashkëpunim me qeverinë Kurti po jep rezultate konkrete. Me një investim prej mbi 330 mijë euro në këtë shkollë, kemi arritur të përgjysmojmë shpenzimet e energjisë dhe, mbi të gjitha, të rrisim komoditetin për nxënësit dhe mësimdhënësit tanë”, tha kryetari Aliu.
Vizita vazhdoi më pas në shkollën fillore “Hasan Prishtina” në Godanc, ku delegacioni u prit nga nxënësit me ekspozita dhe aktivitete të ndryshme. Edhe në këtë shkollë janë realizuar investime të rëndësishme përmes projekteve të efiçiencës energjetike, me vlerë rreth 271 mijë euro, duke arritur kursim të energjisë prej 70.4 për qind dhe duke krijuar ambiente më moderne e më të ngrohta për nxënësit.
Sipas kryetarit Aliu, deri më tani përmes Fondit të Kosovës për Efiçiencë të Energjisë janë investuar afro 1.2 milion euro në pesë shkolla të komunës së Shtimes.
“Këto investime janë dëshmi e punës sonë të përbashkët për një mjedis më të pastër dhe kushte dinjiteti për fëmijët tanë”, tha kryetari Aliu, duke falënderuar Qeverinë e Kosovës për mbështetjen e vazhdueshme ndaj projekteve në komunën e Shtimes.
