Kryetari i Komunës së Shtimes, dr. Qemajl Aliu, në emër të institucioneve komunale dhe gjithë qytetarëve të Shtimes, me dhimbje të thellë, shpreh ngushëllimet më të sinqerta për familjen Fejzullahu, me rastin e ndarjes nga jeta të më të dashurës suaj, Yllkë Fejzullahu, humbje kjo që ka prekur thellë jo vetëm familjen, por edhe mbarë bashkqytetarët tanë.
Lajm tronditës, fort i trishtë e pikëllues, humbja e parakohshme e Drejtoreshës Yllkë Fejzullahu
Bashkaktivistja e ditëve të para të Lëvizjes, mikja jonë e shquar, asambleistja jonë e parë në Kuvend Komunal, Kryetarja e GVV-së, vajza shembullore e urtë, punëtore e intelektuale, na la duke na shkaktuar humbje të madhe.
Yllka ishte drejtoreshë e spikatur e arsimit, që me punën e kontributin e saj ishte frymëzim për çdo të re në komunën tonë, e cila i dha kahje reformës arsimore në Shtime.
Ajo ishte e pakompromis ndaj parimeve dhe tërë jetën e kaloi me integritet të lartë e dinjitet të dalluar njerëzor, intelektual e kulturor. Si pinjolle e një familjeje me themel intelektual e kombëtar, në kulmin e karrierës së saj, pas një sëmundjeje të shkurtër, parakohshëm e në ditët e saj më të mira, na la duke na pikëlluar fort neve bashkaktivistëve të saj, por edhe të gjithë qytetarëve të Shtimes e më gjerë.
Vajza e hekurt, aktivistja shembullore, drejtoreshja e spikatur e arsimit në komunën tonë, do të mbahet mend gjatë mes nesh për vlerat që përçoi ndër vite, por edhe për kontributin e saj institucional, politik, arsimor e kulturor.
Yllkë, do na mungosh shumë mikja jonë. U prehsh në paqe dhe shpirti yt i bardhë e i dëlirë u bëftë dritë!
Dr. Qemajl Aliu
Kryetar i Komunës së Shtimes.
