Kryetari i Komunës së Shtimes, dr. Qemajl Aliu, në emër të Komunës së Shtimes dhe institucioneve komunale, shpreh ngushëllimet më të sinqerta për familjen Ibrahimi, me rastin e ndarjes nga jeta të veteranit të arsimit, Lutfi Ibrahimi nga fshati Muzeqinë.
E nderuara familje Ibrahimi,
Me pikëllim të thellë mora lajmin për ndarjen nga jeta të më të dashurit tuaj, veteranit të arsimit, Lutfi Ibrahimi, një mësues i përkushtuar në fushën e arsimit.
Mësues Luta, siç njihej me respekt e dashamirësi nga qytetarët, dashurinë dhe përkushtimin ndaj arsimit e dëshmoi që në fillimet e karrierës së tij, duke i kushtuar një pjesë të rëndësishme të jetës edukimit dhe arsimimit të brezave të rinj.
Deri në fund të veprimtarisë së tij arsimore, ai mbeti i lidhur me shkollën dhe nxënësit e tij, duke lënë pas një jetë të përkushtuar ndaj dijes, edukimit dhe misionit fisnik të arsimit.
Me ndarjen e tij nga jeta, arsimi humbi një mësues të devotshëm, ndërsa familja, kolegët, ish-nxënësit dhe të gjithë ata që e njohën humbën një njeri të respektuar e të çmuar. Kujtimi për jetën dhe veprën e tij do të mbetet i gjallë dhe do të kujtohet gjithmonë me respekt e mirënjohje.
Në këto momente, ju shpreh ngushëllimet më të sinqerta, familjes Ibrahimi, të afërmve, miqve, kolegëve dhe gjithë atyre që e njohën të ndjerin.
U prehtë në paqe dhe kujtimi për të qoftë i përjetshëm!
Dr. Qemajl Aliu
Kryetar i Komunës së Shtimes
