Shtime, 29 qershor 2026- Në nderim të jetës dhe veprës së humanistit të njohur Samedin Dugolli, në fshatin Pjetërshticë u organizua edhe këtë vit Turniri Tradicional në Futboll të Vogël “Semedin Dugolli”, një aktivitet që tashmë është shndërruar në traditë dhe që bashkon sportdashës, të rinj e qytetarë në frymën e respektit, solidaritetit dhe garës së ndershme.
Edhe këtë edicion, turniri mblodhi futbollistë dhe ekipe nga te gjitha trevat shqiptare, të cilat me paraqitjet e tyre kontribuuan në zhvillimin e një gare cilësore, sportive dhe mjaft atraktive për publikun.
Për të ndjekur nga afër ndeshjen finale të këtij turniri ishte i pranishëm edhe kryetari i Komunës së Shtimes, Dr. Qemajl Aliu, i cili, pasi përshëndeti të pranishmit, falënderoi organizatorët për përkushtimin në ruajtjen e kësaj tradite dhe për organizimin shembullor të turnirit.
Në fjalën e tij, kryetari Aliu tha se ky turnir nuk është vetëm një garë sportive, por edhe një mënyrë e veçantë për të nderuar kujtimin e një njeriu që la gjurmë të pashlyeshme me humanizmin dhe kontributin e tij.
“Me organizimin dhe pjesëmarrjen tuaj jo vetëm që po tregoni respekt për figurën e humanistit të ndjerë Semedin Dugolli, por po jepni edhe një shembull të mirë të organizimit sportiv, kulturor e historik, duke promovuar vlerat tona më të mira. Nuk duhet ta harrojmë se Pjetërshtica ndodhet në një zonë që lidhet ngushtë me Drenicën, një trevë që i dha shumë Kosovës dhe luftës çlirimtare. Edhe Pjetërshtica, si para ashtu edhe pas luftës, ka dhënë kontribut të çmuar për vendin, përmes dëshmorëve, veteranëve, invalidëve të luftës dhe qytetarëve të saj të përkushtuar,” tha kryetari Aliu.
Me këtë rast, ai përshëndeti dhe shprehu mirënjohje për të gjithë veteranët e luftës, familjet e dëshmorëve, veteranët e arsimit dhe të gjithë qytetarët e pranishëm në këtë aktivitet.
Në fund të turnirit u ndanë mirënjohje dhe çmime për ekipet më të suksesshme, ndërsa u shprehën falënderime për të gjitha skuadrat pjesëmarrëse, organizatorët, sponsorët dhe sportdashësit që kontribuuan në mbarëvajtjen dhe suksesin e këtij edicioni.
