Shtime, 12 maj 2026- Në Shtëpinë e Kulturës në Shtime, sot u mbajt programi tradicional i duasë së Haxhit për haxhinjtë e komunës sonë, të cilët së shpejti do të nisen drejt vendeve të shenjta për kryerjen e njërit prej obligimeve më të rëndësishme të fesë islame.
Në këtë organizim të përgatitur nga Këshilli i Bashkësisë Islame në Shtime, morën pjesë përfaqësues të Bashkësisë Islame, nënkryetari i komunës së Shtimes Adnan Ademi, përfaqësues institucionalë, haxhinjtë që do të udhëtojnë për në Haxh, familjarë të tyre, si dhe qytetarë.
Të pranishmit fillimisht i përshëndeti kryetari i KBI-së në Shtime, Skender Baftiu, i cili foli për rëndësinë shpirtërore të Haxhit dhe përgatitjen që kërkon ky udhëtim i shenjtë si dhe mbajti një ligjëratë rreth vlerave dhe mesazhit të Haxhit, duke vënë theksin te përkushtimi, sakrifica, durimi dhe afërsia me Zotin.
Në emër të kryetarit të Komunës së Shtimes, dr. Qemajl Aliu, dhe institucioneve komunale, të pranishmit i përshëndeti nënkryetari i komunës, Adnan Ademi, i cili uroi haxhinjtë për këtë rrugëtim të shenjtë.
“Haxhi është njëra ndër pesë shtyllat kryesore të Islamit dhe simbolizon përkushtimin më të lartë ndaj Zotit, barazinë mes njerëzve, durimin, sakrificën dhe pastërtinë shpirtërore”, tha nënkryetari Ademi, duke u dëshiruar haxhinjve udhëtim të lehtë, Haxh të pranuar dhe kthim të shëndoshë pranë familjeve të tyre.
Programi u shoqërua edhe me ilahi, duke krijuar një atmosferë të veçantë emocionale dhe shpirtërore, ndërsa në fund u bë duaja e Haxhit nga udhëheqësi i haxhinjve për këtë vit, Driton ef. Zenuni, me lutje për pranim të Haxhit dhe mbarësi në këtë udhëtim të bekuar.
