Shtime, 26 prill 2026- Në prani të madhe të qytetarëve, deputetëve të Republikës së Kosovës, bashkëpunëtorëve, këshilltarëve komunalë, familjarëve, aktivistëve dhe miqve, sot u mbajt mbledhje komemorative, nën patronatin e Kryetarit të Komunës, Dr. Qemajl Aliu, në nderim të jetës dhe kontributit të ish-drejtoreshës së arsimit dhe këshilltares komunale, Yllkë Fejzullahu.
Të pranishmit kujtuan me respekt figurën e saj, duke theksuar përkushtimin dhe gjurmët e pashlyeshme që la në arsim dhe në jetën shoqërore e politike të vendit.
Në fjalën e tij, kryetari i komunës, Dr. Qemajl Aliu, e vlerësoi lartë figurën dhe kontributin e Yllkë Fejzullahut, duke theksuar jo vetëm angazhimin e saj institucional, por edhe dimensionin njerëzor dhe miqësor që e karakterizonte atë.
“Jemi mbledhur sot, me një dhimbje e pikellim të thellë në zemër për të nderuar jetën dhe veprën e një vajze të jashtëzakonshme, Yllka Fejzullahut, një bijë e denjë e një familjeje me rrënjë të forta urtesie, intelektuale dhe kombëtare.
Për mua, kjo humbje është edhe personale. Me Yllkën nuk na lidhi vetëm bashkëpunimi institucional, por një miqësi e hershme, një rrugëtim i përbashkët që nis gati 15 vite më parë. Ishim të rinj, me ideale të mëdha, me shumë sfida përpara dhe me pak rrugë të hapura”, tha kryetari Aliu, duke kujtuar rrugëtimin e përbashkët me të ndjerën.
Kryetari Aliu theksoi se Yllka ishte një nga ato figura që nuk ndaleshin përballë sfidave, por përkundrazi, i tejkalonin ato me guxim dhe vendosmëri, duke u bërë shembull për të tjerët.
“Yllka ishte më e mira ndër ne, e meritonte plotësisht emrin që kishte. Çdo detyrë që i ishte besuar, e ka kryer me dinjitet, profesionalizëm e me sukses të plotë, asnjëherë duke mos u ankuar e kërkuar detyra, por detyrat duke e kërkuar atë. Për tre vite si drejtoreshë e arsimit në Komunën e Shtimes, ajo ishte një udhëheqëse me vizion, një zë i fortë për ndryshim dhe një model i rrallë i integritetit institucional. Ajo nuk bënte kompromis me parimet, ishte e drejtë, e ndershme, e kulturuar dhe e palëkundur. Por mbi të gjitha, Yllka ishte njeri, ishte mikja jonë, ajo që dinte të dëgjonte në heshtje, të të jepte forcë kur nuk e kishe dhe të qëndronte pranë në momentet më të vështira”, tha kryetari Aliu.
Në këtë mbledhje komemorative, fjalë rasti mbajtën edhe bashkëpunëtorë dhe përfaqësues të institucioneve e të Lëvizjes.
Alim Rama, sekretar organizativ i Lëvizjes Vetëvendosje, duke shprehur ngushëllimet më të sinqerta për familjen dhe të gjithë bashkëpunëtorët e saj, në emër të Lëvizjes Vetëvendosje, tha se do ta kujtojnë Yllkën, e cila la gjurmë të pashlyeshme në shoqëri. Ai u shpreh se Yllka ishte nga ato gra shembull, e cila në çdo detyrë dhe në çdo angazhim të saj reflektonte përkushtim, dinjitet dhe vlera të larta njerëzore.
Ndërsa Floreta Abazi, në emër të institucioneve arsimore të komunës, vlerësoi lart punën dhe angazhimin e saj, duke theksuar se Yllka ishte një drejtoreshë që bashkëpunoi pandalur për të mirën e arsimit në komunën tonë.
Në emër të familjes Fejzullahu, motra e saj, Arta Fejzullahu, falënderoi të gjithë ata që iu gjendën pranë familjes në këto çaste të vështira. Me një fjalë të ndjerë dhe plot emocion, ajo shprehu mirënjohjen për mbështetjen dhe solidaritetin e treguar, duke dëshmuar forcën dhe dinjitetin e familjes përballë kësaj humbjeje të madhe.
Ajo kujtoi Yllkën si një motër të dashur, të palodhur dhe gjithmonë pranë familjes, duke theksuar se kujtimi dhe vlerat e saj do të jetojnë përherë në zemrat e tyre.
Në përmbyllje të mbledhjes komemorative, solistë nga Kori i Qytetit interpretuan pjesë të zgjedhura instrumentale në nderim të saj.
